పేదలకు కార్పొరేట్ వైద్యం: నేడు అందుబాటులోకి సనత్‌నగర్ టిమ్స్ (TIMS) సూపర్ స్పెషాలిటీ ఆసుపత్రి
తెలంగాణ ప్రజారోగ్య రంగంలో సరికొత్త అధ్యాయం మొదలైంది. పేద, మధ్యతరగతి ప్రజలకు కార్పొరేట్ ఆసుపత్రులను మించిన సూపర్ స్పెషాలిటీ వైద్య సేవలను ఉచితంగా, అందుబాటు ధరల్లో అందించే లక్ష్యంతో నిర్మించిన ‘డాక్టర్ మర్రి చెన్నారెడ్డి తెలంగాణ ఇన్‌స్టిట్యూట్ ఆఫ్ మెడికల్ సైన్సెస్’ (Dr MCR TIMS) సనత్‌నగర్ ఆసుపత్రిని ముఖ్యమంత్రి ఎ. రేవంత్ రెడ్డి నేడు ప్రారంభించనున్నారు.
హైదరాబాద్‌లోని ఉస్మానియా, గాంధీ, నిమ్స్ ఆసుపత్రులపై పెరుగుతున్న రోగుల భారాన్ని తగ్గించడంలో ఈ ఆసుపత్రి కీలక పాత్ర పోషించనుంది.
రూ. 1,126 కోట్లతో మెగా క్యాంపస్
సనత్‌నగర్‌లో 22.6 ఎకరాల సువిశాల విస్తీర్ణంలో రూ.1,126 కోట్ల వ్యయంతో ఈ సమీకృత ఆసుపత్రిని అత్యాధునిక హంగులతో నిర్మించారు. ఇందులో మొత్తం 1,082 పడకలు ఉండగా, అత్యవసర వైద్యానికి పెద్దపీట వేస్తూ ఏకంగా 300 ఐసీయూ (ICU) బెడ్స్‌ను సిద్ధం చేశారు. ఆసుపత్రిలో 37 క్లినికల్ విభాగాలతో పాటు 31 మేజర్, 6 మైనర్ ఆపరేషన్ థియేటర్లు ఉన్నాయి.
కీలక సెంటర్స్ ఆఫ్ ఎక్సలెన్స్
సనత్‌నగర్ టిమ్స్‌ను ప్రధానంగా కార్డియాక్ సైన్సెస్ (గుండె సంబంధిత చికిత్సలు), ఆర్గాన్ ట్రాన్స్‌ప్లాంటేషన్ (అవయవ మార్పిడి) కోసం సెంటర్ ఆఫ్ ఎక్సలెన్స్‌గా తీర్చిదిద్దారు. వీటితో పాటు న్యూరోసైన్సెస్, నెఫ్రాలజీ, ఆంకాలజీ, ట్రామా కేర్ వంటి విభాగాల్లో ప్రపంచ స్థాయి చికిత్సలు అందించేందుకు ప్రత్యేక క్యాథ్‌ల్యాబ్‌లు, అత్యాధునిక పరికరాలను సమకూర్చారు.
ప్రభుత్వ రంగంలోనే తొలిసారి AI న్యూమాటిక్ ట్యూబ్ సిస్టమ్
ఈ ఆసుపత్రిలో సాంకేతికతకు విశేష ప్రాధాన్యం ఇచ్చారు. దేశంలోనే ప్రభుత్వ రంగంలో తొలిసారిగా ఏఐ ఆధారిత న్యూమాటిక్ ట్యూబ్ సిస్టమ్‌ను ప్రవేశపెట్టారు. రోగుల నుంచి సేకరించిన రక్త నమూనాలు, అత్యవసర మందులు వార్డుల నుంచి డయాగ్నస్టిక్ ల్యాబ్‌లకు కేవలం 1 నుంచి 2 నిమిషాల్లోనే చేరేలా ఈ వ్యవస్థ పనిచేస్తుంది. అలాగే 3.0 టెస్లా ఎంఆర్‌ఐ, 128-స్లైస్ సీటీ స్కానర్ వంటి అత్యాధునిక యంత్రాలను అమర్చారు.
సేవలు ఎలా మొదలవుతాయి?
తొలి దశలో నేటి నుంచి ఓపీడీ (OPD) సేవలతో పాటు డే-కేర్ సర్జరీలను ప్రారంభిస్తారు. అనంతరం నెల రోజుల వ్యవధిలో పూర్తిస్థాయి ఇన్‌పేషెంట్ (IPD) సేవలను అందుబాటులోకి తీసుకురానున్నారు. రోగుల సహాయకుల కోసం 200 మంది సామర్థ్యంతో 6 అంతస్తుల ప్రత్యేక ధర్మశాల భవనాన్ని కూడా ఆవరణలోనే సిద్ధం చేశారు.
Leave a Reply